- O conselleiro do Mar destaca o labor da entidade en innovación, sustentabilidade e seguridade laboral no sector pesqueiro
A Xunta de Galicia reforza o seu compromiso coa sustentabilidade e a innovación no sector pesqueiro a través dunha posible colaboración coa Fundación para a Pesca e o Marisqueo (Fundamar). O conselleiro do Mar, Alfonso Villares, reuniuse con representantes da entidade para coñecer en detalle os seus proxectos en marcha e analizar sinerxias co Goberno galego.
Durante o encontro, Villares puxo en valor o papel de Fundamar na mellora da competitividade do sector, destacando o seu traballo en seguridade e saúde laboral, igualdade e innovación social, formación e sustentabilidade. A entidade, que conta cunha composición paritaria entre a patronal ARVI e os sindicatos UXT e CC.OO., é un referente no desenvolvemento de iniciativas que benefician tanto a traballadores como a empresarios do sector marítimo-pesqueiro.
Acompañado pola directora xeral de Pesca, Acuicultura e Innovación Tecnolóxica, Patricia García, e a directora xeral de Desenvolvemento Pesqueiro, Marta Villaverde, o conselleiro coñeceu de primeira man as accións que Fundamar está a levar a cabo. Entre elas, destacan programas de formación orientados á profesionalización do sector, estratexias para fomentar a igualdade de oportunidades e medidas innovadoras en materia de prevención de riscos laborais.
Esta reunión supón un paso máis na aposta da Xunta por fortalecer a cadea mar-industria, un sector crave para a economía galega que enfronta o reto de evolucionar cara a un modelo máis sostible e competitivo. A colaboración con entidades como Fundamar é clave para garantir que a innovación e a seguridade sigan marcando o rumbo do futuro pesqueiro en Galicia.