- O sector retallista do peixe esixe quedar fose do sistema Verifactu, aludindo envellecemento, falta de substitución e excesiva carga normativa.
O sistema Verifactu acende as alarmas nas peixarías
As peixarías tradicionais, xa castigadas polo envellecemento, a burocracia e a falta de substitución xeracional, levantan a voz contra o novo sistema Verifactu. Desde o sector, considérase que esta obrigación de facturación electrónica supón unha ameaza directa para a viabilidade de miles de pequenos establecementos repartidos por toda a xeografía costeira.
Un sector envellecido e sen músculo dixital
A maioría das peixarías retallistas en Galicia e outras comunidades pesqueiras operan como microempresas: negocios familiares con menos de 10 traballadores, en moitos casos xestionados por persoas maiores que apenas dixitalizaron os seus procesos. Neste contexto, a implantación obrigatoria de Verifactu —unha plataforma fiscal de facturación electrónica promovida pola Axencia Tributaria— é vista como un novo obstáculo difícil de salvar.
“A carga administrativa e o custo de adaptación a Verifactu son desproporcionados para un sector que sobrevive con marxes cada vez máis estreitos”, advirte #Luis Bustos Martínez, subdirector xeral da patronal do sector, e responsable de elevar formalmente a petición de exoneración.
Microempresas afogadas en normativa
A preocupación vai máis aló do tecnolóxico. Segundo os representantes do sector, Verifactu é a pinga que colma o vaso tras anos de reformas, cambios normativos e subida de custos estruturais (enerxía, transporte, persoal, seguridade alimentaria etc.)/ etc.). A demanda é clara: adaptar o marco legal á realidade das microempresas se non se quere asistir á súa desaparición.
“Europa apunta cara á simplificación e a protección do pequeno comercio. Aquí imos en dirección contraria. Se queremos unha economía reservada para grandes cadeas e multinacionais, desde logo imos por bo camiño”, critican fontes do sector consultadas por Costa Oeste.
Unha ameaza directa para o comercio de proximidade e o consumo local
En zonas costeiras e do interior, as peixarías de barrio seguen sendo un elo esencial na cadea de valor do mar. Son as encargadas de manter vivo o vínculo entre a frota artesanal, as lonxas e o consumidor final. Pero se seguen pechando por falta de rendibilidade ou por esixencias inasumibles, ese tecido comercial desaparecerá, con impacto directo no consumo de peixe fresco, na soberanía alimentaria e na dinamización dos portos pequenos.
O peche de cada peixaría non só implica a perda dun negocio, senón a desaparición dunha canle de distribución esencial para o produto local do mar.
Onde queda a política pesqueira e comercial?
Neste debate, nin a Xunta de Galicia nin o Ministerio de Economía aclararon aínda se contemplan exencións ou medidas específicas para sectores vulnerables como o da venda retallista de peixe. Por agora, o impulso á dixitalización avanza sen matices, sen distinción entre grandes grupos e microempresas familiares.
O sector reclama que se abra un diálogo real e urxente para adaptar o ritmo das políticas fiscais ao da economía real. Mentres tanto, o reloxo corre para centos de establecementos que poderían non resistir outra onda de cambios.