- O conselleiro do Mar, Alfonso Villares, reafirma o compromiso da Xunta para que Galicia sexa sede do evento de referencia do sector acuícola en España.
O conselleiro do Mar, Alfonso Villares, reuniuse con representantes das tres universidades galegas —Universidade de Vigo, Universidade de Santiago de Compostela e Universidade da Coruña— e co director do Centro de Investigacións Mariñas (CIMA), Carlos Gabín, para manifestar o respaldo da Xunta de Galicia á candidatura galega como sede do XX Congreso Nacional de Acuicultura en 2026.
Durante o encontro, Villares expresou o apoio total do Goberno galego para que a rexión volva ser anfitrioa deste evento que reúne ás principais empresas do sector acuícola a nivel nacional. Destacou que o congreso é un espazo fundamental para o intercambio de coñecementos e o desenvolvemento de innovacións que impulsan a competitividade do sector.
O Congreso Nacional de Acuicultura, que tivo a súa primeira edición en Galicia en 1985 impulsado polo persoal do CIMA, está actualmente organizado pola Sociedade Española de Acuicultura e celébrase de maneira bianual. A última edición levou a cabo este ano en Las Palmas de Gran Canaria. Galicia xa foi sede deste encontro en catro ocasiones anteriores: 1987, 1990, 1993 e 2007, o que reforza o seu papel histórico na evolución da acuicultura en España.
O prazo para formalizar a candidatura de Galicia finaliza a primeira semana de novembro, e espérase contar co respaldo dos centros de investigación mariña da comunidade. Villares subliñou que esta é unha oportunidade única para destacar a fortaleza e o liderado de Galicia na produción acuícola sostible, un sector crave para a economía rexional e cun gran potencial de crecemento como provedor global de alimentos.