- Unha investigación revela que máis dun terzo do bacallau vendido na UE ten información incorrecta sobre a súa orixe, a pesar da estrita normativa vixente.
Oceana alerta sobre etiquetaxe enganosa no bacallaut
A fraude na etiquetaxe de produtos do mar segue sendo unha materia pendente na Unión Europea. A pesar de contar cunha das lexislacións máis estritas do mundo en rastrexabilidade e etiquetaxe de peixes e mariscos, a aplicación destas normativas segue sendo inconsistente. Así o denuncia un recente estudo publicado en Fisheries Research, no que se analizaron 108 produtos de bacallau do Atlántico, revelando que un 34 % das mostras presentaban información incorrecta sobre a súa orixe xeográfica.
A investigación foi liderada por Marine Cusa, asesora de política mariña en Oceana en Europa e investigadora da Universidade Técnica de Dinamarca. Os resultados expoñen que case un terzo das 31 mostras analizadas mediante probas xenéticas tiñan discrepancias na comunicación escrita ou verbal sobre a súa procedencia.
Un problema estrutural e deliberado
Oceana advirte que este tipo de prácticas non só afectan a confianza do consumidor, senón que tamén poñen en risco a sustentabilidade da pesca. “A etiquetaxe precisa dos mariscos é esencial para unha xestión pesqueira responsable”, sinala a organización, que subliña que, aínda que se lograron avances na identificación de especies, a terxiversación da orixe xeográfica segue sendo un problema estendido.
As causas desta fraude son diversas. Por unha banda, a complexidade da cadea de subministración dificulta a rastrexabilidade. Por outro, existen prácticas deliberadas que buscan encubrir a orixe real do produto, xa sexa para esquivar regulacións ou para vender peixe de menor calidade coma se fóra de zonas máis valoradas comercialmente.
Maior transparencia, a única solución
Oceana reclama medidas urxentes para reforzar a rastrexabilidade dos produtos pesqueiros e garantir que os consumidores teñan acceso a información veraz. “Os consumidores deben poder tomar decisións informadas e esixir responsabilidade aos retallistas”, afirma a organización.
O reto é claro: sen unha acción decidida por parte das autoridades e a industria, a fraude na etiquetaxe seguirá minando a confianza do consumidor e poñendo en risco a sustentabilidade dos océanos.