- O proxecto GREEN liderado por CETMAR promove unha rede europea de formación profesional verde para transformar sectores estratéxicos cara á sostibilidade.
Galicia lidera a revolución formativa verde en Europa con CETMAR á cabeza
A transición ecolóxica xa non é só un reto ambiental, senón unha oportunidade estratéxica para o emprego cualificado e sostible en Europa. E Galicia quere liderar ese camiño. O Centro Tecnolóxico do Mar (CETMAR) e os seus socios no proxecto europeo GREEN, cofinanciado polo programa Erasmus+, avanzan na creación dunha Rede Europea de Provedores de Formación Profesional Verde, unha iniciativa pioneira que busca integrar a sostibilidade nas competencias profesionais de sectores industriais chave.
Formación verde para os retos da industria do futuro
Automoción, enerxías renovables, tecnoloxías marítimas, baterías, defensa e fabricación aditiva son os seis eixos prioritarios onde o proxecto GREEN está a actuar. O obxectivo é claro: capacitar á forza laboral europea para un futuro sostible, conectando o mundo da educación coa industria a través dunha formación práctica, aplicada e con impacto real.
En Galicia, CETMAR lidera esta transformación a través de catro cursos piloto en contornas industriais e educativas, nos que participaron traballadores e educadores. Estas formacións permitiron identificar 11 medidas de actuación en sostibilidade dentro da cadea de valor das tecnoloxías marítimas, ademais de proporcionar ferramentas prácticas a 40 docentes para adaptar os currículos formativos a esta nova realidade.
A rede verde xa é unha realidade en Galicia
A rede europea impulsada por GREEN conta xa coa participación activa de tres centros galegos: o CIFP Ferrolterra, o Centro de formación A Aixola e a Universidade da Coruña. Galicia sitúase así á vangarda dun movemento europeo que vai moito máis aló da educación: busca redefinir o perfil profesional do futuro cun enfoque sustentable transversal.
Vigo acolle a nova folla de ruta da formación sostible
O pasado 1 de abril, a sede de CETMAR en Vigo convérteuse no epicentro deste cambio cunha xornada de debate en formato world café, dirixida a responsables de formación profesional e capacitación industrial. O encontro servirá para recoller recomendacións clave para consolidar esta rede formativa, impulsando o intercambio de ideas entre expertos da educación, a investigación e o sector produtivo.
Este evento chegou tras a participación de CETMAR no congreso FP Innova, celebrado na Cidade da Cultura, onde se deron a coñecer os resultados preliminares do proxecto. A iniciativa foi ben acollida por parte da comunidade educativa e profesional, que ve neste modelo unha ferramenta útil para responder aos desafíos globais desde o ámbito local.
Un consorcio europeo, unha visión común
O proxecto GREEN está coordinado pola European Federation For Welding, Joining And Cutting (EWF) e conta cun consorcio multidisciplinar formado por:
- CETMAR (España)
- CT INGENIEROS (España)
- VSB – Technical University of Ostrava (República Checa)
- Mercantec (Dinamarca)
- University of Cyprus (Chipre)
- CECIMO Aisbl (Bélxica)
- Olife Corporation AS (Noruega)
- AC-Hydraulic A/S (Dinamarca)
Esta colaboración internacional busca crear sinerxías reais entre a educación e a industria para acelerar a adaptación ecolóxica das competencias profesionais, fomentando a innovación e a resiliencia no mercado laboral europeo.