- ARVI organiza en Santa Pola as xornadas NETTAG+, centradas en mitigar o impacto ambiental das artes de pesca e a xestión de residuos mariños no Mediterráneo.
O pasado 19 de setembro, a Cooperativa de Armadores de Pesca do Porto de Vigo (ARVI) celebrou na Confraría de Pescadores de Santa Pola (Alacante) as xornadas do proxecto NETTAG+, cuxo obxectivo principal é previr e reducir os impactos ambientais dos aparellos de pesca e os refugallos mariños asociados. Estas xornadas, dirixidas ás pesqueiras mediterráneas, contaron coa asistencia de máis de 30 persoas, incluídos socios da Confraría de Pescadores e a Asociación de Armadores de Santa Pola, estudantes do Instituto Politécnico Marítimo Pesqueiro de Alacante e profesionais do sector.
Durante o evento, expertos en sustentabilidade pesqueira ofreceron formación sobre a xestión de residuos nos portos pesqueiros e o desenvolvemento de solucións tecnolóxicas innovadoras para o seguimento e recuperación de aparellos perdidos. Entre os relatores destacaron José Antonio Díez, secretario da Confraría de Pescadores de Santa Pola, Javier García Galdo, director técnico de Sinerxia Consultora, e Alberto Prieto, xestor de proxectos I+D+i en ARVI.
A obxectivos clave de NETTAG+ inclúen capacitar aos pescadores para adoptar prácticas máis respectuosas co medio ambiente, promover a reciclaxe e a reutilización de refugallos mariños, e recompensar o esforzo voluntario na recuperación de lixo recollido pasivamente nas artes de pesca. Ademais, están a desenvolverse solucións tecnolóxicas como marcadores acústicos de baixo impacto e sistemas robóticos para detectar e recuperar aparellos de pesca perdidos no fondo mariño.
O proxecto NETTAG+, financiado polo programa Horizonte Europa, forma parte da misión da UE “Restaurar os nosos océanos e augas para 2030”. Continuando o traballo iniciado polo seu predecesor, NeTTag (2019-2021), NETTAG+ amplía o enfoque preventivo ás rexións mediterráneas e fomenta a cooperación entre pescadores, fábricas de aparellos, autoridades portuarias e cidadáns. O proxecto reúne a un equipo internacional e multidisciplinar composto por 15 socios de 7 países, que inclúe científicos, autoridades pesqueiras, ONG e empresas tecnolóxicas.
Desde ARVI destacouse o éxito do evento e a importancia da colaboración coa Confraría de Pescadores e a Asociación de Armadores de Santa Pola para avanzar na sustentabilidade pesqueira. Seguirase traballando estreitamente co sector pesqueiro e outros actores crave, co firme compromiso de protexer os recursos mariños para as xeracións futuras.